Cinderellár Kissá

Boóut age ar bicí durór zobanat mazé, éçe uggwá dúñri beça aiccíl. Ítartu uggwá gura zíi aiccíl, íbar nam óiyede Ellá.

Ek din, beça íba yé Ellá ré beçi uggwá lói sinno gorái diyé. Beçi íbartú duwá zérfua asé. Ellár baf e hoórdé, “Beçi íba arde aññí loi hailla cádi óibou. Íba, tor átai maa óibou. Ar iín, tor átaitou bóin, Hílda arde Gílda óibou”. “Ar ekkán bicí frecanir hotá, biyá ói móttor añártu hámaká lamba musáfer ót zaa foribóu.” Ellá bicí taajub óigiyói. Lékin, íba endila bicí miçá ar gom dé, íba yé noya gór-guccí ré mani loiféláiye. Ar Ellá yé baf oré waada diyédé, “Óu baá, ítarattú ziín lagibóu lagouk aññí tará ré saiyóum.”

Ellá yé fottí zon oré kúci rakí bélla bicí duk gorí ham goré. Íbar átai maa ye Ellá ré hámicá ekkán nó ekkán ham diyat táke. Hílda arde Gílda ye dinthíya kélaá, ar aram goré, noóile egezá mithái háat táke.

Ellár átai maa ye hoórde, “Añár zíiyain ókkol bicí norom dé ótolla gór or thung thang ham gorí no faríbóu”. “Ítara bicí bála, ar gura maiya fuain ókkol, hámaká háandani maincór fuain loi biyá óibou de.”

Ellá yé íbar átaitou bóin ókkol ólla zedín-gorí-fare-édin goillé yó, ítara íba ré egeza bicí zilloti goré, ar técera.

Ek din Hílda ye Gílda re hoórde, “Saáwa! Suláttu hoila ókkol dola gorér de. Añára íba ré aijja loti Cinderellá (Hoila!) hoói dhakiyóum”.

É din ázinná, baccár hóborgwa ye baccár fuar cóbat mazé zaibellá dorozat aái yóre doot diyé. Gílda ye sikkarai hoórdé, “Añáráttu hondila fiñdá forerdé?”

Hílda, Gílda arde ítarar maa ye bála uttom hoor ókkol findé. Cinderellá ye hoórde, “Añártu hondila fiñdá foribóu?”

Íbar átai maa ye sikkarai hoórdé, “Toré noó dhake!” Sóiyigorí hoilé, Cinderellá ré yó, doot diyé, mogór íbar átai maa ye zane dé, kihoilé, zodi Cinderellá cóbat zailé, baccár fua ye Hílda ré arde Gílda ré ebbre no saibóu.

Ítara gór ot guzi tákoya ókkol, ar bálayo éto noó. Cinderellá yé íbar átai maar hotá biccác noóza. Íba yé doot diyé dé ciñçí ré cek goijjé, mogor dehér dé ciñçí yían óre ooin ot zolai félaiye.

É raitta, Cinderellá yé íbar hamarát máze boói yóre cóbar baabote bicí ferecani gorí báfer. Íba yé “Aññí keén arzu goittám zaifari bélla“, mone mone hoói yóre niyác félar. “Tóile tui faribí,” hoórde abas uggwá fúner. Íba taajub óiyoré dehérde, fouri uggwá asimbit hontú aái giyégói. Fouri ye hoórde “Aññí tor Fourima“. “Aññí tor arzu fura gourí bélla aiccíde“.

Íba yé Cinderellá ré, gór or fisór barizar íkka, neelai loi giyé. Fouri ye íbar súañ loi fakkárai loiyé mottor, miçá houdú uggwá, ekkán cúnar falki garí boni giyégói. Ar sair gwá undur cúndoijja dóla gúra boni giyégói. Duwá añsila cúdoijja falki gari-solouya boni giyói. Cinderellá yé hoórde “Kafí taajjuippa ná,”. “Mogor Fourimaa, añártu tó kessú fiñdí bélla nái.” Fouri maa ye áñci yóre íbar súañ ré abbar fakkárai loiyé.

Cinderellá émmikká saiyé ár, dehérde uggwá cúndoijja cóbar goón findá. Íbar sul ot mazé híra findá, théñg ot mazé cóñço anar nasonir zuta findá. Cinderellá yé guzori hoórde, “Cúkuria, Fourima!” Fouri ye úñcíar gorí diyé dé, “Tortú raitor nicír age, cóbar tú hámaká neeli zagói foribóu”. Mijík rait nicí foijjonto táaibou dé. Cinderellá yé goríbóu bóuli waada diyóré cóbar
íkka solai giyói.

Cóbat mazé fottí zon é kíyal gorérde, baccár fua ye cúndoijja noya maiyar uore díandóri saái táikke. Ar, fura rait fán honíkká lói no naser, seróf íbar lói baade. Atíkka, góuçit baró wá bázor góndha foijjé. Cinderellá baccár gór ottu zendila toratori fare éndila duñri neeli giyói. Fisórtú razar fua ye duñri giyé, lékin, íte dóri faribár agortú Cinderellá añdár ót luwai giyégói.

Duwadit mazé, Cinderellártú íbar anar zuta ekkán fori giyói. Razar fua ye deikké ár feñçai loi raikké. Cóñço zuta yían átot dóri rakí, razar fua ye hoórde, “Zodi añár tú hámaká decót mazé doc matta tuwa foille yó, aññí cúndoijja maiya fua ibá tuaiyóum, zibár tú zuta iín fít ó. Aññí faile, íba ré cádi goijjóum kiállá hoilé, íbar dhóilla cúndoijja maiya fua aññí honódin loot noófai.” Tarfordín lóti, razar fuar cóicca muhábbót óre tuai bélla toiyari cúru gorí diyé. Decór bútore fottí gór ot mazé zai saár.

Hílda arde Gílda, ar fottí maiya fuain ókkol, ítarar nizor théñg oré anar zutar bútore sibi sibi gólai bellá kucíc goijjé. Zuta wá endila cóñço dé, honíkkár théñg or bútore no góle. Razar fuar manúic ókkol Cinderellár gór ottú neeli zargói dé étukkun ót mazé, Cinderellá ré baguwan ot mazé ham gorérde deikké. Íbar átai maa ye misá banai hoórde, “Ki, íba tó uggwá códoran ham goróni”. “Hámaká, tuñáñrar motolob to íba ré fiñdái saibélla noó to. Íba yé cóbat mazé yó noó uçé”.

Razar fuar maincé Cinderellá ré zuta fiñdái saibélla zurgoijjé. Yián ebbere fít óiye.

Ze woktót mazé Hílda, Gílda arde íbar átai maa ókkol córme guzorer, Cinderellá ré boóut duré baccár killar éçe loi zaibélla gór ottú neelai loi giyói. Cinderella arde razar fua cádi goijjé. Yíar baade abadul abad kúci gorí táikke.

Yián tú ahéri.